काठमाडौं, २४ जेष्ठ ।। बिस ।। नेकपा एमालेका उपमहासचिव तथा बैचारिक नेता घनश्याम भूसालले एमालेको राजनीतिलाई विकृत बनाउन केही समूह खडा भएको आशंका व्यक्त गर्नु भएको छ ।
सामाजिक सञ्जाल फेसबुकमार्फत नेता भूसालले आफूहरुकाविरुद्ध अनर्गल प्रचार सुरु गरिएको भन्दै त्यसको धारणा राख्नु भएको हो ।
भूसालले एकताको कुरा गर्दा त्यसलाई आत्मसमर्पणको रुपमा व्याख्या गर्ने र विवादको कुरा गर्दा विभाजनको रुपमा व्याख्या गर्ने एउटा समूह नै तयार भएको उल्लेख गर्नु भएको छ ।
पञ्चायतकालिन राजनीतिको स्मरण गर्दै नेता भुसालले भन्नु भएको छ, “‘पञ्चायत कालमा राजनीतिलाई विकृत बनाउने सत्ता संरक्षित समूह मण्डलेका रुपमा स्थापित भयो । पञ्चायत धराशायी हुनुमा त्यस समूहको कम्ति योगदान थिएन । त्यसबेलाका कतिपय पञ्चहरु नै त्यस समूहसँग आजित भएर संसदमै ‘सुकुलगुण्डा’ भनेर विरोध गरेको सम्झिन्छु,’ नेता भुसाल आशंका व्यक्त गर्दै लेख्नु हुन्छ, “आज नेकपा एमालेको राजनीतिलाई विकृत बनाउन त्यस्तै समूह त खडा भएको छैन ? अनि परिणाम पनि त्यस्तै हुने त होइन ? निष्कर्षमा नेता भुसाल भन्नु हुन्छ, “धेरैजसो सपेराहरु सर्पबाटै टोकिएका छन्।”
